Traballadores da sanidade privada concentráronse este mércores ás portas dos principais hospitais da provincia da Coruña para reclamar a negociación dun convenio que “mellore” as súas condicións laborais.
Segundo informou a CIG, denunciaron que “lonxe de aceptar melloras”, a patronal “pretende que perdan dereitos” que xa tiñan alcanzados. Por iso, teñen prevista unha concentración diante da Consellería de Sanidade para o día 5 de febreiro e unha nova xornada de folga para o día 5.
As concentracións deste mércores coincidiron cunha folga parcial desde as 10,00 ata as 12,00 horas que se mantivo a pesar de que a patronal convocou unha reunión da mesa de negociación o día 2 de febreiro. “Forzados pola presión que exercemos nas rúas e nas anteriores folgas, explicou o representante da CIG, Miguel Tizón.
Unha mesa de negociación, engadiu Tizón, para a que “descoñecen as intencións” da patronal porque a día de hoxe “non se presentou oferta ningunha, nin documentación” que sinalou que teñen a sensación de que “van ir para facer o paripé”.
Para o persoal “é indispensable” que a patronal “retire” a súa pretensión de “rebaixar o cobro” dos trienios e de “condicionar o cobro” en caso de baixas. Xunto a isto apuntaron, como “condición indispensable”, que se inclúan o cobro dos domingos xa que, sinalou Tizón, “non é o mesmo” traballar un luns que un domingo”. Finalmente, advertiu á patronal de que “se non inclúe” esas demandas, xunto coa redución da xornada, a negociación, por parte da CIG, “non irá a ningún lado”.
