A IX edición das Xornadas do Lacón con Grelos ‘Lacónicas’ estarán presentes en 31 restaurantes da cidade da Coruña, nunha edición que terá lugar entre o 8 de febreiro e o 3 de marzo.

Así o informou o concelleiro da área de Fomento e Promoción da Cidade, Gonzalo Castro, que presentou este luns, xunto á concelleira de Turismo, Diana Cabanas, esta nova edición, que incluirá a posibilidade de recollida e servizo a domicilio e ofertas para grupos.

Xunto a representantes de negocios participantes, o edil incidiu na significación que os Entroidos teñen na cidade herculina e remarcou unha iniciativa que busca tamén “dinamizar” ao redor destas festas.

Os establecementos que ofrezan servizo a domicilio ou recollida no local deberán ofrecer un servizo sustentable con recipientes e materiais respectuosos co medio ambiente.