O Concello da Coruña conmemora o 25 aniversario do Aquarium Finisterrae co lenzo ‘Atlántico’, a cargo do artista coruñés Manuel Suárez. A alcaldesa, Inés Rey, presentou esta mañá a obra, única no país polo seu formato. Rey estivo acompañada polo concelleiro da área de Fomento e Promoción da Cidade, Gonzalo Castro, e Manuel Suárez, que aborda na súa obra a conexión do artista co Océano Atlántico.
“O Atlántico forma parte da nosa identidade como cidade e deste Aquarium e desde hoxe queda non só no seu exterior, tamén no corazón do museo”, sinalou Rey. A peza mural, situada na sala Maremagnum, é unha obra de técnica mixta sobre un lenzo dunha soa peza de 2,50 metros de alto por 60 metro de longo, sendo a única coñecida no mundo nun soporte de tales dimensións.
