O presidente do PP local da Coruña e portavoz do grupo municipal no consistorio coruñés, Miguel Lorenzo, instou á alcaldesa da Coruña, Inés Rey, a “reflexionar” tras o “voto de castigo ás políticas socialistas” que, ao seu xuízo, supuxo o resultado das eleccións galegas.
Así o manifestou nunha rolda de prensa convocada para valorar os resulados electorais na cidade herculina despois de que o PP lograse en Galicia a súa quinta maioría absoluta. Lorenzo, que destacou que dos 13 deputados electos seis son afiliados do PP da Coruña, asegurou que para a cidade herculina este resultado “asegura investimentos”.
En particular, destacou o “crecemento constante” en número de votantes e co “triplo de votos que o grupo municipal socialista”. “E case 15.000 votos máis que o BNG”, expuxo o presidente do PP local, que cualificou de “histórico” o resultado da populares fronte á “desfeita” do PSOE.
“Un de cada dous coruñeses que exerceu o dereito ao voto votou ao PP“, sentenciou para remarcar tamén que respecto das municipais esta formación “gañou 15.400 votos e o goberno de Inés Rey perdeu 17.400 votos”. Estes datos, engadiu, “deben facer reflexionar” ao grupo socialista no Concello da Coruña, ao que instou ao “diálogo”.
