Un vehículo ardeu por completo e o lume afectou a outro mentres estaban estacionados na rúa Francisco Añón, na Coruña, e non houbo que lamentar danos persoais. Segundo informou o 112, foi ao fío das 12.30 horas deste sábado cando un particular, que se atopaba no lugar, deu a voz de alarma e engadiu que había coches estacionados á beira do vehículo afectado. Os Bombeiros da Coruña explicaron que o incendio foi por mor dun problema na batería do vehículo e afectou a outro que estaba estacionado diante.

Tamén repercutiu nas lúas dun baixo comercial no que se atopaba un home co seu can (evacuados tras a extinción do incendio) e ao portal do edificio. O fume introduciuse pola ruptura duns vidros, debido á radiación térmica, e os bombeiros ventilaron tanto o baixo como o tiro de escaleiras do propio edificio (sen incidencias). No operativo interviñeron tres vehículos e nove bombeiros, a Policía Local e a Policía Nacional.