‘Visibilización, prevención e sanción da violencia de xénero dixital’ é o título da xornada formativa que a Delegación do Goberno e a Universidade da Coruña (UDC) organizan para o día 25 de abril, dirixida aos profesionais do ámbito da igualdade, a protección das mulleres e as Forzas e Corpos de Seguridade.
Esta sesión, que se integra nas actuacións do Pacto de Estado contra a Violencia de Xénero, celebrarase no salón de actos da Facultade de Dereito da UDC, polo que a inscrición estará aberta tamén aos estudantes e profesionais do dereito que desexen asistir. Para iso, deberán cubrir o formulario antes do día 11 de abril.
“Durante a sesión abordarase a realidade da violencia de xénero dixital, como leva a cabo, como podemos detectala cando se produce e que normativa e ferramentas xurídicas existen para frear e sancionar aos seus autores”, concretou a Delegación do Goberno nunha nota de prensa.
A xornada parte da extensión de novas formas de violencia de xénero a través das redes sociais e que, tal como asegura a Delegación, “increméntase coa Intelixencia Artificial”. Estas distintas formas de violencia serán explicadas pola profesora de dereito constitucional e decana da facultade, Ana Aba Catoira, que detallará ademais as respostas normativas e xudiciais existentes.
O catedrático de dereito constitucional da Universidade de Santiago (USC) José Julio Fernández Rodríguez e a pedagoga e profesora en pedagoxía, da mesma universidade, Lorena Casal Otero dialogarán sobre a pervivencia da discriminación por medio de instrumentos tecnolóxicos e da desinformación.
A Delegación apunta a que estas situacións se dan, especialmente, en colectivos máis vulnerables como a adolescencia. Así, apunta a que os efectos negativos poténcianse por “a baixa percepción de riscos” da violencia.
