O Tribunal Superior de Xustiza de Galicia (TSXG) confirmou a condena ao Sergas a indemnizar con 70.900 euros por falta de medios no CHUAC a unha muller, de 73 anos, que sufriu un ictus. Os feitos ocorreron o 13 de marzo de 2019 cando a muller ingresou no hospital por sufrir un cadro clínico de parálise facial e alteracións da linguaxe.
Unha vez no hospital realizáronlle diversas probas que confirmaron que a paciente estaba a sufrir un ictus isquémico polo que, como tratamento, os profesionais sanitarios propuxeron unha trombectomía. Con todo, como a sala para realizar a operación estaba ocupada co tratamento doutro paciente, a muller tivo que esperar e cando a sala se liberou transcorreran máis de dúas horas.
Así, cando a sala quedou liberada, recolle a sentenza, realizouse outro TAC de control para, a continuación, “dado o resultado do mesmo, descartar xa o tratamento revasculizador” e decidir o seu ingreso na planta de Neuroloxía. A muller recibiu o alta hospitalaria en maio de 2019 e presentaba diferentes secuelas neurolóxicas secundarias e, posteriormente, a Xunta recoñeceulle unha discapacidade do 80 % como consecuencia das secuelas sufridas a raíz do ictus.
DESESTIMACIÓN DO RECURSO DO SERGAS
O Sergas impugnou a sentenza do Xulgado do Contencioso-Administrativo número un de Santiago de Compostela e alegou que a intervención non se realizou porque estaba contraindicada na historia clínica. Neste sentido, na sentenza apelada, o xuzgador considerou que “na historia clínica da paciente consta expresamente que os especialistas que a atenden no CHUAC prescriben a trombectomía como tratamento adecuado para resolver o ictus, polo que non podemos agora dicir o contrario”. Por todo iso, o TSXG desestimou o recurso do Sergas e da súa aseguradora e confirma a sentenza do Xulgado do Contencioso Administrativo.
VALORACIÓN DO AVOGADO
Pola súa banda, o avogado que defendeu á familia, Cipriano Castreje, remarcou que as dúas sentenzas, tanto a do xulgado como a da sala, son “realmente importantes”. “Non só por apreciar a existencia dunha infracción da lex Artis na súa vertente de perda de oportunidade, senón porque de forma clara sinalan que unha sala de neuroradioloxía nun hospital de terceiro nivel é insuficiente para levar a bo fin o protocolo de atención ao ictus en Galicia“, apuntou.
Non se trataba, continuou, dunha circunstancia extraordinaria, senón do feito de que coincidían dous pacientes coa mesma doenza e de forma simultánea necesitaban atención emerxente. A xustiza, neste caso sinala que é “inconcibible” que, en circunstancias rigorosamente normais, un paciente quede sen recibir a atención médica emerxente, porque só haxa unha sala. Por tanto, segundo Castreje e con base a esta sentenza que “perfectamente razoa” a circunstancia pola que esta paciente queda con esas secuelas, por falta de medios, o prudente sería crear unha nova sala de neuroradioloxía no CHUAC dada a súa infradotación“.
