O xuízo polo asasinato do coruñés Diego Bello, abatido a tiros en xaneiro de 2020 na illa de Siargao, en Filipinas, continuará o 17 de xuño, segundo informan os seus achegados, que avanzan que á mesma acudirán familiares.
En concreto, os seus pais estarán presentes nunha nova sesión da causa que se segue en Manila contra tres policías filipinos “acusados de ter asasinado ao empresario coruñés e de falsificar probas para tratar de xustificar a súa morte”, remarcan nun comunicado.
Os axentes argumentaron no seu momento que dispararan en defensa propia cando ían deterlle por suposto tráfico de drogas, algo que a familia do mozo coruñés rexeitou desde un primeiro momento.
Posteriormente, as investigacións realizadas pola NBI (National Boreau of Investigation), un organismo independente do Estado filipino, concluíu “que os policías asasinaran a sangue frío a Diego”.
“E que colocaran nas súas mans unha pistola e unhas doses de cocaína, tentando así explicar a súa morte como defensa propia”, remarca a familia. Agora o día 17 celebrarase unha nova vista na que se continuará co testemuño do experto en balística do NBI.
