Colaba onte, a xunta de Goberno entre outros asuntos, e vendendo o fito como un gran paso na axenda verde municipal, a aprobación da autorización para a tramitación do convenio relativa ao parque do Agra do Orzán, o esperado Campo da Burra. Pero nese convenio, o Concello permite a Juan Carlos Rod. Cebrián, propietario dos terreos onde se situaban as Adoratrices, construír unha serie de vivendas.
Ante a falta de información municipal, a Asociación de Veciños Agra, que leva décadas loitando pola apertura deste parque, espera á reunión do vindeiro martes para facer valoracións. “Imos esperar que nos dean explicacións para dar a nosa valoración”, valora Ricardo Seixo.
Tras varios procedementos xudiciais, o Tribunal Superior de Xustiza categorizou unha parte como zona de espazo libre, pero parte da parcela privada como solo urbano consolidado. Agora, co convenio, o Concello permítelle construír a Cebrián varios edificios nunha zona que necesita espazos verdes “tras moitas décadas de agarda”, como precisamente recoñecía a alcaldesa Inés Rey.
Quedará, pois o novo parque do Agra do Orzán reducido ao espazo que linda entre as rúas Gil Vicente, José Amador López, Canceliña e Observatorio. Si que terá acceso peonil dende a Avenida de Gregorio Hernández
Mentres, o Concello traballa en paralelo coa AEMET para levar a cabo a apertura do parque do Observatorio, actuación recollida nos Orzamentos Municipais no marco do “Plan de humanización e investimento dos barrios da cidade”, cunha primeira fase para o derrubamento dos muros da Canceliña e da rúa Páramo.
Licenza para a construción de 40 vivendas públicas en Xuxán
Paralelamente a Xunta aprovou a licenza concedida ao Instituto Galego de Vivenda e Solo (IGVS) para a construción dun edificio de 40 vivendas de promoción pública (VPP) en Xuxán, na parcela Z-13 do barrio. O novo edificio estará dividido en cinco andares, nos que se repartirán as 40 vivendas e outros tantos rochos, 5 locais e un garaxe 88 prazas de aparcadoiro, divididas en dous sotos. O investimento total do proxecto é de 5,8 millóns de euros.
Máis novas
A veciñanza da Agra do Orzán volve á rúa ante a “inoperancia” do Concello co Parque da Agra
Así será o primeiro edificio da macrourbanización de San Pedro de Visma
