O director de Turismo de Galicia, Xosé Merelles, participou este luns na presentación dunha nova edición do Morriña Festival, que se celebrará entre o venres 26 e o sábado 27 de xullo na Coruña e contará coas actuacións de artistas como Louis Tomlinson (ex de One Direction), Nicki Nicole, Aitana ou Lola Índigo.

No acto, Merelles puxo en valor o compromiso da Xunta coa celebración do evento, “coa intención de intensificar a oferta turística da cidade que está a ser un dos destinos urbanos máis destacados“. Tal como dixo, a urbe herculina é o segundo destino urbano con maior demanda turística de Galicia, crecendo no que vai de ano un 4 %. “É un destino que gusta, e moito, e con grandes eventos e citas musicais como estas contribuímos a incrementar o seu atractivo”, engadiu.

O Morriña comezará o vindeiro venres, día no que actuarán Louis Tomlinson, Editors, Nicki Nicole, Iván Ferreiro, Dani Fernández, Juan Magán, Sen Senra, Dorian, Marlena e Enol. O sábado será a quenda de Aitana, Lola Índigo, A A Love You, Yandel, Iñigo Quintero, Dei V, Pedro Capó, Malmö 040, Dollar Selmouni, Yeico x Troni, Garabatto, Tashi e Toni Seijas.