O Salón do Cómic da Coruña inaugura unha nova edición, tras a súa inauguración oficial esta tarde e nun formato “adaptado aos novos tempos”, segundo subliñou a alcaldesa, Inés Rei, no acto.
Trátase da vixésimo sétima edición que se prolongará ata o 18 de agosto e que busca ser, de acordo coa organización, “un punto de encontro para amantes do cómic”, baixo a dirección do autor Manel Cranio, presente na inauguración, no Quiosco Alfonso, xunto a autores e autoras.
O Salón Internacional do Cómic da Coruña acollerá un total de 18 exposicións, máis de 100 sesións de firmas, a mostra dos traballos de máis de 40 autoras e autores galegos, unha vintena de editores de toda España presentes na Coruña durante o evento e máis de 30 actividades na ‘Rúa daBD’, que contará cun total de 36 expositores.
As temáticas sociais, a internacionalización e a aposta polo cómic independente e experimental son as claves do festival, que dedicará exposicións monográficas a Genie Espinosa, Lucas Varela, Marcello Quintanilha, Kundo Krunch, Susanna Martín, Marc Torices, Yeyei Gómez e Jorge Campos.
Durante o sete días de festival, asinarán os seus libros Artur Laperla, Paula Cheshire, Miguel Robledo, Bea Lema, Martín Romeu, Fran Jaraba, Jordi Bayarri, Emma Ríos ou David Rubín, entre moitas outros.
Viñetas 2024 acolle, tamén, as exposicións dos gañadores do Premio Castelao de Banda Deseñada 2023, Paula Maior e Cristian F. Caruncho, e a mostra dos fanzines do I Premio Autobán, ademais da exposición colectiva ‘Toriyama en Galicia’, que lle rende homenaxe ao autor Akira Toriyama, creador de personaxes xa míticos como Son Goku ou Arale.
