A Batalla Naval iluminará o ceo da Coruña este venres nunha nova edición con máis de 750 quilos de material pirotécnico, segundo informou o consistorio coruñés sobre un evento que terá lugar no paseo marítimo, a partir das 23.30 horas. Para o mesmo, disporanse dúas zonas de disparo dos lumes. A principal estará situada na coraza das Escravas e a outra será en Leira dos Mariño. A montaxe comezou este xoves ás 09.00 horas. O espectáculo contará coas últimas novidades en material pirotécnico. Ademais, haberá unha gran cantidade de efectos dixitais.

“As fachadas serán amplas e a varias alturas, coa construción de composicións aéreas con movementos coreográficos de cor e efectos variados, uniranse varios momentos culminantes cun final multicolor de carcasas, abanicos pirodixitais, que darán paso á gran descarga de ruído para pór punto e final ao espectáculo”, sinala o goberno local sobre unha proposta que durará 20 minutos. Noutra orde de cousas, o consistorio cifrou en máis de 78.000 as persoas que asistiron ás propostas musicais ao redor de ‘Noites en María Pita’. Omar Montes bateu a marca de espectadores na praza herculina con máis de 26.000 persoas.