Son moitas as pintadas e os graffitis que invaden as nosas paredes, ata o punto de que o Concello vén de impulsar unha campaña loita contra as pintadas vandálicas, con brigadas de limpeza e mesmo potenciando a arte urbana con graffitis.
Pero hai algunhas (e non falamos desas sinaturas estupidas cargadas de ego) que parecen estar por riba do ben e do mal. Así acontece coas pintadas “VIVIMOS EN DEMOMAFIA”. A máis incónica está no túnel dos Castros. Leva máis de 2 anos e mesmo parece que os operarios municipais pintaron toda a parede pero quixeron deixar a zona da pintada.
Esta crítica social que trata de denunciar a corrupción no mundo da política, trascende as fronteiras da nosa cidade. Téñense visto estas pintadas pola M30 de Madrid, coa mesma caligrafía, pero parece que o ADN do “artista” urbano é herculino.
Nos últimos meses podemos ver tamén estas pintadas no Paseo das Pontes, na Avenida de Oza en fronte do Materno, en Alfonso Molina diante do concesionario de Flexicar, e nalgún outro punto da cidade. Quen estará destrás desta incónica frase?
De Monte Alto á Guarda
E en clave de graffiti, estes días uns amigos nos enviaban unha foto da Guarda, onde chegaron os graffiteiros de Monte Alto con esta pintada do 15002. Leva xa dende 2018 e parece que gustou porque non a dan eliminado.
Campaña de loita contra as pintadas
O Concello anunciaba a semana pasada o comezo da campaña contras as pintadas no autorizadas. Vén de abrir a licitación dun novo servizo integral que, como novidade, suma á limpeza dos danos e a sanción ás persoas infractoras a elaboración dun inventario de muros libres que sirvan como soporte de graffitis autorizados. Tamén se realizarán talleres educativos dirixidos a escolares co fin de conciencialos/as da importancia de respectar e coidar a contorna.
Explicaban que os grafiteiros teñen a sensación total de impunidade, e saben que só serán sancionados sen son cazados in fraganti.
Desde a posta en marcha da Oficina Virtual do Graffiti en 2021 realizáronse un total de 8.143 actuacións de limpeza de pintadas. Cunha media de catro pintadas por actuación son un total de 32.572 pintadas eliminadas. No que vai de ano, leváronse a cabo 1.282 actuacións, cun total de 5.128 pintadas eliminadas.
En todo caso, piden á veciñanza que informe a través do 010.
