Hoxe 10 de outubro, é o Día Mundial da Saúde Mental, e a Organización Mundial da Saúde (OMS) centra este 2024 a súa temática na importancia de coidar a saúde mental na contorna laboral. Así o resalta Saúde Mental FEAFES Galicia, que incide en que se trata dunha problemática que nos atinxe a todxs, pois o 47% das persoas ocupadas indican atoparse expostas a factores de risco para a súa saúde mental no seu lugar de traballo.

As baixas laborais relacionadas coa saúde mental aumentaron considerablemente, sendo esta a segunda causa máis común de baixas, tras os trastornos musculoesqueléticos. No 2023 rexistráronse en España case 600.000 baixas por este motivo, un 16% máis que o ano anterior, segundo o Ministerio de Inclusión, Seguridade Social e Migracións. Así e todo, a cousa é moito máis grave, pois o 60% das persoas traballadoras que pasou por un problema de saúde mental non deixou de ir ao traballo.

A precariedade laboral está en moitas ocasións detrás do malestar que senten as persoas na súa contorna laboral. Baixos salarios, contratos temporais, falta de conciliación, elevados ritmos ou sobrecarga de traballo, acoso laboral ou brecha salarial, son algunhas das formas que pode adoptar a precariedade laboral. España é un dos países da Unión Europea con maior taxa de poboación ocupada en risco de pobreza e exclusión social e máis da metade das persoas empregadas no noso país son precarias.

A pesar de que o 76% das empresas afirma preocuparse pola saúde mental, a cifra descende ao 47% cando se lle pregunta ao persoal sobre este compromiso da empresa e aínda baixa máis, ata o 38%, se responden as persoas con problemas de saúde mental.

Por todo isto, Saúde Mental FEAFES Galicia insta ás empresas a que se impliquen na creación de contornas laborais seguras, saudables e inclusivas, nas que se coide e se fale de saúde mental, sen tabús nin prexuízos. Igualmente, pídese á Administración Pública que impulse medidas contra a precariedade laboral e o control de riscos psicosociais no tecido empresarial.

Inserción laboral

Outra pata da mesma mesa é a inserción laboral, fundamental para as persoas con problemas de saúde mental. Para as persoas con problemas de saúde mental, o traballo, ademais de ser un camiño cara a normalización e a integración, ten tamén unha función terapéutica, pois despraza o rol de “persoa enferma” polo rol de “persoa traballadora”.

Segundo o INE, a taxa de emprego das persoas con problemas de saúde mental é do 17,55%, a máis baixa de todas as discapacidades. Con todo, destacan que cun servizo especializado detrás, a inserción laboral do colectivo pode ascender ata o 62%, cifra acadada pola nosa entidade no 2023.

Máis novas

#Conectacoavida, a nova campaña de Prevención do Suicidio de FEAFES