O Pazo de Mariñán, no municipio coruñés de Bergondo (A Coruña), acolle este xoves e venres unhas xornadas para abordar os desafíos da mobilidade sustentable e a evolución tecnolóxica na seguridade viaria e na asistencia ás vítimas, con demanda de redobrar esforzos neste ámbito.
O foro está organizado coa colaboración da Deputación da Coruña, Stop Accidentes, o Ministerio Fiscal e a Universidade de Santiago de Compostela (USC).
Na inauguración participaron o presidente da Deputación, Valentín González Formoso, o director do Instituto de Criminología da USC, Gumersindo Guinarte; María Rivas, subdelegada do Goberno na Coruña e Jeanne Picard, presidenta de Stop Accidentes.
Formoso sinalou que no último ano nas estradas da provincia a sinistralidade aumentou, cun total de 36 vítimas mortais ata mediados de novembro, 14 máis que o ano anterior, un dato que cualificou de “inaceptable” e que “evidencia a necesidade de redobrar esforzos neste ámbito”.
Neste sentido, destacou que detrás de cada unha das vítimas “hai un drama humano, familiar e social”, un aspecto no que tamén inicidió a presidenta de Stop Accidentes, Jeanne Picard, que subliñou que as mortes por accidentes de tráfico “son unha traxedia humana e un problema de saúde pública”.
As xornadas tamén abordarán aspectos como a axilización da xustiza en casos de sinistralidade viaria e a adaptación a novas realidades como os vehículos de mobilidade persoal (patinetes eléctricos) ou os límites de alcoholemia máis estritos que se implantarán en España.
