Carlos Reguera foi un dos activos fundadores da rede Acampa pola Paz e o Dereito a Refuxio, e o seu traballo incansable foi fundamental para sacar adiante cada un dos oito Encontros Internacionais organizados na Coruña. Esta semana coñecíase o seu pasamento, e por iso a rede quere lembralo agradecendo “o seu compromiso inquebrantable”.
Reguera foi militante activo da defensa dos Dereitos Humanos durante máis de 20 anos vocación humanista na que levaba militando desde que tiña vinte anos, como membro da a organización “Mundo sen guerras e sen violencia”. Foi, de feito, o organizador de dúas das cadeas humanas pola paz que xuntaron no Paseo Marítimo coruñés aos alumnos e alumnas de trece colexios da cidade.
Coidou tamén do programa “Simplemente xente” de CUAC FM, un espazo destinado a poñer en valor a diversidade cultural das persoas migrantes e transmitir a súa riqueza multiplicadora. Precisamente este programa tivo de ser suspendido onte pola súa ausencia. Reguera era ademáis corresponsal da axencia de noticias Pressenza en Galicia e a alma mater das retransmisións dos Encontros de Acampa pola Paz a través das ondas de CUAC Fm. Sempre ao quite, díante da mesa de control que a emisora instalaba na carpa dos Xardíns.
En xuño do 2025 Acampa pola Paz e o Dereito a Refuxio celebrará o seu noveno Encontro Internacional, centrado no “Dereito á Paz”, e de seguro que a rede o lembrará dalgún xeito.
