Pleno importante o que se celebra esta mañá na Coruña, coa proposta do grupo de goberno dos Orzamentos de 2025 e a emenda presentada polo PP.
Tras un longo e tenso debate, tanto a emenda como a proposta de orzamentos foron rexeitas. A emenda popular cos votos en contra de PSOE e BNG, e os orzamentos cos votos en contra de PP e BNG.
Ao remate das votacións, a rexedora sinalou que vai someterse a unha moción de confianza vinculada aos Orzamentos nun pleno extraordinario o vindeiro martes 11 de febreiro.
Isto significa que a oposición tería un mes para conformar unha alternativa de goberno, pero se non consegue chegar a un acordo para investir un novo alcalde (vai ser complicado ver ao PP e BNG chegar a un acordo), as contas serían aprobadas automaticamente.
O BNG considera que “as contas carecen de credibilidade”
O grupo municipal do BNG votou contra o proxecto de orzamentos formulado polo Goberno Local para 2025 porque “as contas non son críbeis, exclúen a participación cidadá na súa elaboración -ao non se prever a realización dos presupostos participativos- e recortan as competencias de control do Pleno”.
“Non se pode gobernar catro anos en minoría e a golpe de cuestión de confianza. Está na súa man rectificar se, de verdade, queren asegurar a gobernabilidade do Concello”, afirmou Jorquera. “Confianza é precisamente o que non inspira este proxecto de orzamentos a
ollos do BNG”, espetoulle, lembrando ademais o “baixo nivel de execución das contas de 2024, nomeadamente nos capítulos de investimentos”, en relación a obras pendentes como o mercado e centro de saúde e cívico de Santa Lucía, mellora dos centros cívicos ou de equipamentos culturais como a Domus, o Fórum ou o Rosalía de Castro, fondos para as bibliotecas de Novo Mesoiro e Palavea, para o Parque de Monte Martelo- desprázanse agora para as contas de 2025.
Máis novas
