A xunta de persoal do Complexo Hospitalario Universitario dá Coruña (CHUAC) presentou este mércores un escrito (poden consultalo aquí) ante a Consellería de Sanidade, na súa sede en Santiago, para solicitar o cesamento do xerente da área sanitaria, Luís Verde, pola “falta de seguridade” dos traballadores que levan “anos” denunciando.

Un escrito presentado un día despois de que a Xunta anuncie “dez medidas encamiñadas a previr as agresións e as situacións de violencia no entorno sanitario”

“O Xerente da Área Sanitaria non sabe falar c@s traballador@s”

Aínda que a agresión sufrida por un enfermeiro e un vixiante o pasado luns no servizo de urxencias por parte dun paciente con problemas psiquiátricos acrecentou as medidas reivindicativas, os sindicatos xa advertían que “non hai protocolos” adecuados.

En declaracións aos medios á entrada da sede de Sanidade, no barrio compostelán de San Lázaro, a presidenta da xunta de persoal do Chuac, Lucía Peón, explica que o protocolo de actuación ante as urxencias psiquiátricas “está totalmente obsoleto”.

“No 2012, as urxencias nin sequera están onde están agora, para que nos fagamos unha idea. E é un protocolo que non fala de que persoas teñen que intervir, como hai que facer… É dicir, é un protocolo moi xenérico que non está adaptado”, asegurou.

Ademais, tal e como explica o escrito presentado ante o rexistro da Consellería, levan “anos” sinalando a “falta de camas” na unidade psiquiátrica de agudos do Hospital de Oza, o que implica que haxa pacientes que “permanecen días ou semanas” nas urxencias do Chuac.

Neste sentido, rexeita a medida provisional da Xerencia de dispor dúas habitacións na unidade de rehabilitación para este tipo de doentes “cunha enfermeira na porta” para vixiar, algo que “estigmatiza ao paciente”.

Segundo Lucía Peón, o xerente “leva anos dicindo que van aumentar as camas” en Oza e chegou a anunciar que a obra arrincaría “en xaneiro” deste ano, pero “está sen empezar”.

A presidenta da xunta de persoal –que inclúe aos sindicatos CIG, CCOO, UXT, CSIF, Ou’Mega, Satse e SAE– advertiu que existe “unha infracomunicación” das agresións a persoal, que en multitude de ocasións non chegan a ser físicas, como a ocorrida a semana pasada, senón verbais.

“E é responsabilidade súa (do xerente) actuar, porque nós levamos tempo denunciando esta situación de conflitividade que non se resolve. Entón, por iso pedimos o seu cesamento agora”, incidiu Peón.

ASISTENCIA A RECLUSOS DE TEIXEIRO

Así mesmo, a xunta de persoal inclúe no seu escrito a situación de inseguridade na atención primaria de Teixeiro, en Curtis, que implica tamén aos reclusos do centro penal.
Aínda que existe un protocolo protocolo que establece que deben participar as forzas da orde pública nesta atención, “non se está cumprindo continuamente”.

10 medidas inmediatas

A Xunta anunciaba onte a posta en marcha de dez medidas de aplicación inmediata fronte a situacións violentas e agresións que se poidan producir nos distintos departamentos do Complexo Hospitalario Universitario da Coruña e outros dispositivos asistenciais da área:

• Incrementar os efectivos de  seguridade e revisar os protocolos existentes, sempre asesorados polos expertos na materia e buscando tamén referencias noutros hospitais.
• A revisión e actualización, por parte dos profesionais especialistas na materia, tendo en conta as suxestións que se fixeron na propia reunión, dos protocolos clínico-asistenciais a pacientes potencialmente agresivos.
• Seguir traballando no proceso de  análise causa-raíz, xa iniciado, do evento sucedido a semana pasada.
• A posta a disposición de apoio psicolóxico a través do servizo de saúde mental da área, non só para as persoas que sufrisen agresións verbais ou físicas, senón aquelas que teñan temor ou lles xurdan dúbidas sobre calquera tema relacionado con este asunto, e o correspondente asesoramento legal relacionado coas agresións ou a violencia en xeral na contorna sanitaria.
• A extensión do botón do pánico en todas as áreas do hospital nas que sexa posible.
• Levar a cabo esta mesma semana unha reunión coa Fiscalía Xeral de Galicia na procura de colaboración e medidas que axuden a paliar este problema.
• A posta en funcionamento dunha nova unidade de ingreso hospitalaria de saúde mental, coa que se incrementan o número de camas nun 40%, así como o persoal facultativo e sanitario preciso para atender a estes pacientes.
• Incremento da derivación a outras áreas sanitarias, dos doentes que precisen ingreso, mentres non se dispoña camas suficientes para atender a estes pacientes.
• Incremento da derivación, previa reserva de camas, a centros concertados adicados a atención a estes doentes dentro da nosa comunidade autónoma
• Iniciar as actividades formativas xa propostas e solicitar a relación de actividades detectadas aos responsables dos servizos e supervisións de enfermaria e dende  a dirección dirixir e supervisar que leven a cabo ademais de organizalas e financialas

Máis novas

O colectivo sanitario sae á rúa para esixir “un traballo seguro”

Denuncian unha marea de pingueiras que asolagan o Hospital Marítimo de Oza “dende hai anos”