Facua Galicia denunciou a Cinesa ante o Instituto Galego de Consumo por prohibir o acceso con comida e bebida adquirida no exterior aos seus cinemas situados no centro comercial Marineda City, na Coruña. A asociación sinala, nun comunicado de prensa, que a actividade principal desta empresa non é a hostalaría, senón a exhibición cinematográfica, polo que a prohibición de consumir bebidas e comidas do exterior adquiridas fóra do recinto “non é necesaria para a correcta consecución da actividade comercializada”. Ademais, indica que no interior dos cinemas situados no centro comercial é posible adquirir tanto comida como bebida, aínda que a prezos máis altos.
Facua Galicia advirte que esta prohibición por parte de Cinesa “vulnera o texto refundido da Lei Xeral para a Defensa dos Consumidores e Usuarios, que establece como cláusula abusiva toda práctica que cause ‘un desequilibrio importante dos dereitos e obrigacións das partes que se deriven do contrato”. De igual forma, cita á comisión de cooperación de consumo, que estableceu na súa consulta número 5 do ano 2000 que “as cláusulas nas que se impón ao consumidor limitacións en orde á adquisición dos produtos sen fundarse en circunstancias obxectivas deben ser consideradas abusivas”.
A asociación tamén sinala que unha sentenza do Tribunal Superior de Xustiza de Castela-A Mancha sobre a prohibición de entrar aos cinemas con comida e bebida recolle que “resulta irrazonable entender a limitación da capacidade de elección do consumidor” e que “se se limita a posibilidade acceder á sala en función da procedencia dos produtos e só se poden consumir os adquiridos no seu interior, resulta que de maneira indirecta está a imporse que utilice servizos que en principio non solicitou pero que se ve forzado a pedir á propia empresa”.
Ademais, a Axencia Española de Consumo, Seguridade Alimentaria e Nutrición (Aecosan), agora Aesan, publicou en 2016 un informe, tamén relacionado coa prohibición en cinemas, no que concluía que existía unha “cláusula abusiva” xa que o consumidor “vese privado da prestación principal, de forma inxustificada, abonando a entrada, en base a unha limitación imposta unilateralmente respecto dun servizo accesorio que non solicitou, e tendo en conta que a actividade básica da empresa non é a venda e distribución de comida e bebida”.
Por todo iso, Facua Galicia insta ao Instituto Galego de Consumo a que abra o correspondente expediente sancionador contra Cinesa “pola práctica abusiva de prohibir o acceso aos seus cinemas con alimentos adquiridos no exterior”. De igual forma, a asociación sinala a todas as persoas que poidan verse afectadas por esta práctica (xa sexa un cinema, un festival de música ou calquera outro tipo de evento) que poden acudir a Facua para que valore o exercicio de accións en defensa dos seus dereitos.
