Novo reto que se marca a iniciativa cultural “Aquí tamén se fala” do IES Rafael Dieste. E o que non consigan eles non o vai conseguir ninguén. Este ten 120 anos de historia, e vai custar, pero a mocidade de Labañou ten clara que a súa vontade pode con todo.
Así, a maior campaña de dinamización da lingua galega exercida activamente pola mocidade da historia do país, proponse, como nova acción de promoción da lingua galega, conseguir que o Real Clube Deportivo empregue o topónimo oficial a partir da seguinte temporada, 2025-2026, na que o club celebra o seu 120 aniversario:
“Real Club Deportivo da Coruña”.
Realmente non é tan difícil, e de feito, xa hai moitas xeracións que así o usan, malia que ninguén se atrevera, ata hoxe, a abrir este melón. En todo caso, o feito de que sexa un grupo de rapaces e rapazas do Instituto fan desa campaña un arma normalizadora imparable.
Apoios
A campaña –liderada e promovida polos profesores Alberto Pombo, Arcadio González e Mónica Reigía– nace ademais cunha chea de apoios que inclúen o presidente da Real Academia Galega, a presidenta do Consello da Cultura Galega, o reitor da Universidade da Coruña, o conselleiro de educación e os responsábeis de lingua da Xunta de Galicia, da Deputación e do Concello da Coruña, o presidente da Federación de Peñas, excapitáns do club, representantes do tecido cultural ou expertos en toponimia. Pouco a pouco o irán debullando na súas redes sociais.
Ademais, e representando o sentir de varios milleiros de estudantes, todos os institutos públicos da Coruña, representados nos seus directores e directoras, nos xefes e xefas dos departamentos de lingua e nos e nas responsábeis dos Equipos de dinamización da lingua galega, sumaron o seu apoio á campaña galeguizadora.
O manifesto “O Dépor é da Coruña”
Todos e todas elas asinaron un breve manifesto
Riazor é máis que unha praia de auga branquiazul. Nos días de xogo, milleiros de persoas fan medrar arredor desta casa o corazón da cidade. A Coruña orgúllase do seu club.
Desde 1906 o Dépor viu medrar a Real Academia, as Irmandades da Fala, a Cova Céltica, o pulo editorial de Lar e Nós, a reivindicación do Estatuto ou a Lei de Normalización.
Superando a longa noite de pedra, outras institucións e clubs deportivos restituíron con dignidade e orgullo histórico os seus topónimos oficiais e patrimoniais. Deixar pasar esta eiva ten consecuencias que xeran disonancia e confusión na íntima relación do club e a cidade, pois é imposíbel pensar A Coruña sen o RC Deportivo, nin o Dépor sen A Coruña.
Este club nunca tivo medo de avanzar e diso dan proba os grandes éxitos colleitados, os xogadores que estamparon o seu nome nesa camisola, a creación pioneira dun equipo feminino ou a participación nunha liga comprometida coa diversidade e a inclusión. Na mesma liña, o apoio do Deportivo á lingua galega é manifesto na comunicación que realiza nos correos, nas redes sociais ou desde o propio estadio.
Por todo iso, polas xeracións futuras, pola unión entre club e seareiros e por dar cabo dunha demanda que vén de longo percorrido, coidamos que o Deportivo debe ser da Coruña e que o cento e vinte aniversario do club pode ser, ademais, unha oportunidade histórica para demostrar compromiso e responsabilidade. Coraxe e determinación. Orgullo e identidade.
O Dépor é da Coruña.
Os responsábeis do proxecto estrean tamén hoxe unha nova páxina web (aquitamensefala.gal) con información e recursos, e anuncian xa novas accións que ampliarán o percorrido da iniciativa. A primeira delas terá lugar este mesmo domingo, durante a previa do xogo do RC Deportivo contra o Cádiz, onde estarán repartindo e regalando 15.000 colantes co slogan da campaña, “O Dépor é da Coruña”, nas inmediacións do estadio.
Desde a plataforma estudantil anima a quen queira apoiar esta nova iniciativa a etiquetar as contas de Aquí tamén se fala nas redes sociais (@aquitamensefala), así como a empregar o cancelo #odéporédacoruña.
Máis novas do proxecto
O “Aquí tamén se fala” leva o meirande premio á Innovación Educativa de Galicia
