Continúan os problemas no Centro de Orientación Familiar de Orillamar. Un servizo sanitario dependente do Concello que leva sufrindo a falta de atención por parte das administracións
Desta volta, as traballadoras veñen de poñer un cartel na porta recoñecendo que non poden atender o “teléfono de citas até novo aviso” por “falta de persoal administrativo”.
O asunto xa ten pasado polo pleno a través da concelleira do BNG Mercedes Queixas, que denuncia que critica que “o Goberno Local continúa sen dotar o COF de Orillamar de dúas prazas, unha de persoal administrativo e outra de psicoloxía, das que si dispuxo en anos anteriores”.
“É unha vergoña que pola falta de persoal non se estean a tramitar citas, o que está pasando é un insulto aos dereitos das mulleres”, afirma Queixas.
Para Queixas, a razón desta desatención radica “na falta de diálogo responsábel” entre o Goberno Local e a Xunta, a outra administración con competencias neste centro, até o punto de a propia Valedora do Pobo ten instado a ambos executivos, coruñés e galego, a que se coordinen para garantir os dereitos das mulleres.
