Os concellos en Galicia póñense en marcha para facer fronte á situación de emerxencia xerada polo apagamento. Vigo, A Coruña e Santiago piden evitar desprazamentos en vehículos e en todos os casos reforzaron a presenza dos efectivos municipais para garantir a maior seguridade.

Na Coruña, o Goberno municipal activou un gabinete de crise para facer fronte aos efectos da falta de subministración na cidade. O Concello mobilizou para todos os efectos de emerxencias: os axentes fixéronse cargo do control de tráfico nas principais cruces da cidade e o corpo de bombeiros mobilizouse para atender os diversos incidentes, entre eles colaborar para liberar a persoas atrapadas en ascensores, segundo traslada a corporación nun comunicado.

Por outra banda, non se rexistraron “incidentes relevantes” nas primeiras horas na cidade herculina; e os colexios manteñen os seus horarios, polo que recomendan “actuar con normalidade” a pais, nais e titores legais á hora de recoller aos seus fillos. Así mesmo, insisten en que non hai incendio na Refinería, senón que o fume obedece aos propios sistemas de seguridade das instalacións e non supón perigo algún para veciños e traballadores da planta.