O PP rexistrará no Senado unha pregunta e unha moción sobre a situación de cooperativistas do barrio coruñés de Xuxán ante, segundo as súas denuncias, a subida do aluguer social en relación ás vivendas proxectadas.

“Para que o Goberno do Estado garanta o financiamento adecuado aos cooperativistas de Xuxán”, sinala a formación popular nun comunicado.

A pregunta rexistrada formúlase para que sexa o Goberno “o que responda directamente e sen evasivas a se vai flexibilizar o financiamento para que se manteña o carácter social da promoción”.

Na moción, que se aprobará, subliña, ao contar o PP con maioría absoluta na Cámara Alta, ínstase a que o Executivo central “garanta un adecuado financiamento do ICO, xa que pretende establecer un modelo que fai inviable o acceso dunha parte importante dos cooperativistas”, sinala.

Faino fronte aos argumentos do Goberno, trasladados polo seu máximo responsable en Galicia, Pedro Blanco, que rexeitou que teña que ver cos créditos ICO e instou á Xunta a asumir as súas competencias nesta materia.