A familia de Yoel Quispe, o mozo de 22 anos apuñalado mortalmente na Noiteboa de 2023 na Coruña, pide penas de entre 15 e 25 anos de cárcere para tres rapaces, para un deles como autor de asasinato, para outro como cooperador e un terceiro como cómplice.
Así o ratificaron fontes da familia en relación a un escrito de acusación particular que amplía a petición de condena a máis persoas fronte a Fiscalía que ve responsable dun delito de homicidio ao principal investigado.
A acusación particular entende que é autor dun delito de asasinato e que as outras dúas persoas tamén tiveron implicación en relación a uns feitos que se produciron sobre as 06.30 horas na confluencia das rúas Juan Flórez e Sinfónica de Galicia.
Fiscalía sostén que o único mozo para o que pide condena viu a varios individuos agredíndose mutuamente, polo que se achegou para pór paz entre eles. “Por motivos non aclarados, a actitude inicialmente conciliadora do acusado deu paso a outra agresiva contra Yoel e, de feito, un e outro se empezaron a golpear mutuamente con empuxóns, patadas e puñadas”, expón no seu escrito.
Tamén engade que, nun momento dado, tería ido a xunto un amigo a coller unha navalla, sen que estea acreditado, para o Ministerio Público, se este segundo home animouno ou non a utilizala contra Yoel. A partir de aí, abriu a folla desta arma branca e atacou á vítima realizándolle varios cortes na clavícula e no coiro cabeludo, para logo apuñalalo no corazón e no abdome.
O procesado foi detido o 28 de decembro de 2023 e enviado a prisión provisional desde entón. A familia alega a existencia de probas para pedir que non só se condene por asasinato a esta persoa, en lugar de por homicidio, senón que tamén se xulgue e condene a outros dous.
Por outra banda, e á espera de que se fixe o xuízo por estes feitos, avanzou que convocarán unha protesta o 5 de xuño con motivo da declaración doutras dúas persoas, no seu caso por lesións.
