O Tribunal Superior de Xustiza de Galicia (TSXG) avala a legalidade de duas actuacións urbanísticas polémicas na Coruña e en Oleiros. Trátase, por unha banda da resolución da xunta de goberno local da Coruña de maio de 2023 na que se outorgou á comunidade de propietarios dun edificio de San Roque de Fóra licenza urbanística de obras de demolición e reconstrución para a legalización do inmoble e o cambio de sistema de cooperación por expropiación para axilizar a demolición dun edificio en Oleiros-
En concreto, a sección segunda da sala do contencioso-administrativo do tribunal desestimou o recurso interposto por unha particular contra o auto do Xulgado do Contencioso-administrativo número 4 da Coruña que deu por executada a sentenza do TSXG que declarou ilegal a licenza do inmoble coa execución do proxecto aprobado polo Concello. A sala indica que a parte recorrente “non dá argumento suficiente que acredite que o acto municipal de maio de 2023 non se axuste ao ordenamento xurídico”, pois “simplemente refire ser ditado en fraude de lei e, en consecuencia, contrariando o fallo da sentenza”.
Engade que, con todo, estase “ante un novo acto que permitirá a adecuación do edificio á normativa urbanística vixente”, á vez que resalta que non se constata que “se dirixa a eludir o fallo”, senón a “efectuar obras de demolición e reconstrución a fin de poder ser o edificio legalizado”.
Pola súa banda, a sección segunda da Sala do Contencioso-administrativo do Tribunal Superior de Xustiza de Galicia (TSXG) considerou xustificadas as “razóns de urxencia e necesidade” que o Concello de Oleiros esgrimiu para cambiar o sistema de cooperación polo de expropiación para proceder á demolición, xa prevista no Plan Xeral de Ordenación Municipal (PXOM), dun edificio situado no inicio da estrada de Mera.
A modificación, segundo consta na sentenza, ten como obxectivo “paliar a desproporción das cargas e beneficios que suporía continuar co sistema de cooperación, cuxo canle non leva a unha solución satisfactoria”. No fallo, a Sala explica que o Concello decidiu adquirir os aproveitamentos urbanísticos do POL-4 Santa Ana, entregando a cambio aos titulares de terreos e edificacións aproveitamentos urbanísticos equivalentes no SUD-2, “o que supón o cambio do sistema de cooperación ao de expropiación, formulando o pago en unidades de aproveitamento equivalentes no ámbito do SUD-2”.
Este cambio, tal e como destacan os maxistrados, foi realizado debido a que “os custos eran moi elevados para os propietarios, polo deber imposto pola PXOM de proceder á demolición do edificio”.
