Esta semana, está desenvolvéndose en varios barrios da cidade, en Bergondo e na Facultade de Dereito (entre outras localizacións), a rodaxe de “Una muñeca vestida de azul”, unha curtametraxe de temática social que aborda con sensibilidade e firmeza o abuso sexual infantil.
Trátase dun proxecto de Traballo de Fin de Grao de tres estudantes da Facultade de Ciencias da Comunicación da Universidade da Coruña: Alba Gilda (directora), Daniela Calvo (produtora) e Alejandro Añón (deseño de produción e dirección de fotografía). Os 3 cambreses, co apoio de Cristóbal Añón, que xa coñecemos doutros proxectos, están lanzando esta “proposta cinematográfica que busca crear conciencia, abrir conversacións necesarias e dar visibilidade a unha realidade que segue sendo silenciada”.
Completan o equipo novos profesionais con experiencia no sector audiovisual, así como exalumnos da Facultade de Ciencias da Comunicación da UDC, que achegan o seu coñecemento e compromiso a unha produción que combina formación académica e sensibilidade social.
O elenco actoral conta con figuras destacadas do panorama audiovisual galego, como Fernando Morán, Iolanda Muiños e Xulio Abonjo, xunto a Maruxa Vázquez, Daniella Rio, Adriana Morais e Triana Campos.
Ademais, numerosas empresas galegas quixeron apoiar esta iniciativa, achegando o seu granito de area para facer posible a rodaxe: Candeas, Froiz, Segurlain, As Puntadas, Bescal, Florería Magnolia Concept, Florería Alba, Estilo gráfico, Rotumax, Filamento e Undodez, entre outras.
A curta narra a historia de Olivia, unha nova marcada pola perda da súa irmá Candela e polos silencios que rodean o seu pasado. Dez semanas despois da traxedia, os recordos e os pesadelos que a atormentan
empezan a cobrar un novo sentido. No corazón da historia, unha boneca esquecida simboliza a infancia arrebatada e o lazo irrompible entre dúas irmás.
Máis novas
O thriller herculino e en galego “Somnia”, finalista do festival de curtas de Xixón
