O presidente da Deputación da Coruña, Valentín González Formoso, defendeu implantar unha facultade de Medicina na Coruña, tras a formulación a este respecto da Universidade coruñesa. A preguntas dos xornalistas, dixo que “hai unha demanda da sociedade de maior ampliación do persoal de médicos que agora se desatende”.

“Non entendo por que se van quedar fóra”, afirmou sobre os que non conseguen entrar en Galicia na universidade pública. Respecto diso, considerou que se pode manter o “papel preponderante” da Facultade de Santiago e crear outra para dar “resposta a esa inquietude social”. O presidente da Deputación da Coruña fixo estas declaracións con motivo da presentación dun congreso promovido conxuntamente co Consello de Contas.