A Praza de Tabacos xa acolle as carpas que serven para desenvolver a Semana Europea da Mobilidade (SEM2026). Ata o próximo martes 22, a cidade acollerá unha ampla programación con actividades educativas, divulgativas, deportivas e culturais para todos os
públicos.

Nos toldos estarán presentes os servizos municipais de Mobilidade, Medio Ambiente e Seguridade Cidadá, así como BiciCoruña. Tamén participan Tranvías Coruña, que dará a coñecer o servizo de transporte urbano e colaborará con sorteos de bicicletas pregables e bonos de autobús, e empresas vinculadas á mobilidade como Eptisa e Aluvisa, con paneis informativos.

“Para A Coruña a mobilidade non é cousa dunha semana. É o modelo de cidade polo que levamos anos traballando”, sinalou Rey, que destacou as características da Coruña como “unha cidade compacta, de apenas 37,5 quilómetros cadrados, na que moitos dos desprazamentos diarios poden facerse a pé, en bicicleta ou en transporte público”.

A programación inclúe actividades de educación viaria e ambiental, rutas escolares e abertos á cidadanía, visitas ao CIMoB, circuítos de habilidades e propostas sobre accesibilidade e seguridade viaria. Todo da man da Concellería de Mobilidade, Mobilidade, Medio Ambiente e
Seguridade Cidadá, pero tamén das entidades colaboradoras: AMI-Asociación Montañeiros Independentes, Mobi-Liza, Stop Accidentes, Galicia Rollers, VMP Coruña, GRUMICO, Termaria, a Federación de Asociacións de Veciños e as entidades veciñais participantes, xunto con Amigos del Acordeón, A.C. Donaire, o Coral Polifónica El Eco e a Xefatura Provincial de Tráfico.

Bicicoruña e os carrís bicis, un eixe prioritario

Se algo cómpre destacar da actuació do goberno municipal nos últimos anos en materia de mobilidade, é a súa rotunda aposta polo servizo de BiciCoruña e pola ampliación a rede ciclable. Unha rede de carrís bici que supera xa os 57 quilómetros de rede ciclable, 7 máis ca en 2023, e con case outros 3 quilómetros actualmente en execución.
A renovación e ampliación de BiciCoruña traduciuse nun forte crecemento do servizo, que dispón actualmente de 856 bicicletas, 85 estacións e 19.116 persoas usuarias. Só entre xaneiro e agosto deste ano contabilizáronse máis de 1,9 millóns de usos, 100.000 máis ca en todo o ano 2025.

Durante a SEM, os paneis informativos instalados na praza de Tabacos permitirán tamén coñecer datos reais sobre como se move a cidadanía. Os sistemas de medición rexistran unha media diaria de 931 bicicletas na praza de Ourense, 867 na avenida da Habana e 535 en Ramón y Cajal.

No caso da mobilidade peonil, contabilízanse diariamente 22.964 persoas na rúa Compostela, 15.571 en San Andrés e 14.243 en Alcalde Marchesi, tres espazos que experimentaron importantes transformacións urbanas nos últimos anos e que hoxe gozan diariamente milleiros de persoas. Como referencia, pola rúa Alcalá de Madrid pasan unhas 16.000 persoas ao día, preto de 7.000 menos que pola rúa Compostela.

Precisamente o lugar escollido para abrir a SEM é un dos puntos de maior demanda da rede de bicicleta pública. A estación da praza de Tabacos é actualmente a cuarta con máis usos de BiciCoruña, por detrás das de Porta Real, praza de Pontevedra e Casa da Auga. Para darlle resposta ao incremento de persoas usuarias neste enclave, o Concello ampliou a estación mediante un sistema de dobre ancoraxe. A actuación permite pasar das 12 bicicletas actuais a 25, máis que duplicando a súa capacidade.

Marchas nórdicas

Durante varias xornadas, a AMI-Asociación Montañeiros Independentes organizará marchas nórdicas con diferentes saídas desde a praza de Tabacos e outros puntos da cidade, previa inscrición.

Cine

A cultura terá tamén presenza na SEM con dúas sesións de cineme ao aire libre: o venres proxectarase “El 47” , cunha presentación previa de Javier Trigales, e o sábado será a quenda de “E.T. El extraterrestre”.
As sesións estarán acompañadas da repartición de cornetes de lambetadas entre as persoas asistentes. O venres terá lugar tamén a Friday Mobility Night de Galicia Rollers, este ano con temática verde.

Unha charla de Mobi-Liza

Entre as novidades e citas destacadas figura, para o venres 18, a xornada sobre mobilidade e coidados “Mobilidades invisibles”, organizada por Mobi-Liza no MUNCYT, xunto cos roteiros en bicicleta (con inscrición previa).

Mobi-Liza organiza no MUNCYT unha xornada sobre Mobilidades Invisibles

A Rolda peonil

Ademais, o domingo hai un paseo veciñal pola rolda Peonil da man da Federación de Asociacións Veciñais da Coruña, acompañados por A.C. Donaire:

Un roteiro veciñal para reinvidicar a Rolda Peonil que atravesa a cidade

O 22, Día sen Coches

A Semana concluirá o martes 22, Día sen Coches, co corte do tráfico da rúa Concepción Arenal entre as 17.00 e as 20.00 horas. A calzada converterase durante a tarde nun espazo para a cidadanía con educación viaria, circuítos de habilidades, patinaxe, zumba na rúa con Termaria, música coa Coral Polifónica El Eco e actividades de Medio Ambiente.

Máis novas

A praza de Tabacos acolle o groso da Semana Europea da Mobilidade