O Concello da Coruña segue avanzando na declaración definitiva da cidade como Zona de Mercado Residencial Tensionado mediante a elaboración dun plan de medidas que contará coas achegas dos principais sectores implicados. Así o expón tras celebrarse a Mesa Sectorial de Vivenda, presidida polo concelleiro de Urbanismo, Francisco Díaz Galego, no Palacio Municipal de María Pita.
Na reunión, informouse as entidades e asociacións presentes sobre os avances logrados desde a declaración da cidade como Zona de Mercado Residencial Tensionado. Tamén se solicitaron contribucións para o plan de medidas que está a elaborar o Concello, requisito necesario para a implementación de medidas que permitan regular os prezos do aluguer na Coruña.
