Este mércores 18 de xuño, a Federación de Construción e Madeira da CIG convoca unha concentración coincidindo co acto de conciliación polo despedimento do presidente do comité de empresa de Carpintería Ramón García (CRG). A concentración, que seguramente non será moi numerosa polo clima de medo ás represalias que persegue aos traballadores da empresa, será ás 11:30h diante do Sección de Mediación, Arbitraje y Conciliación (S.M.A.C.) da Coruña (diante do IES Zalaeta).
Para a CIG, “este despedimento supón un grave caso de represión sindical, perpetrado contra un traballador que se destacou pola súa defensa activa dos dereitos laborais do persoal da empresa. O compañeiro asumiu a representación da sección sindical da CIG en 2023 e foi elixido presidente do comité tras gañar as eleccións sindicais en 2025. Desde entón impulsou importantes iniciativas, como a activación do Comité de Seguridade e Saúde, a negociación do Plan de Igualdade e a denuncia da exposición a po de madeira dura, altamente perigoso para a saúde, asi coma melloras para o conxunto dos compañeiros e compañeiras de taller, obra e oficinas”.
Dende a CIG reclaman “a inmediata readmisión do compañeiro e facemos un chamado á solidariedade para denunciar esta inxustiza e defender o dereito á actividade sindical libre e combativa”.
