Este mércores, día 3, comeza unha nova fase de traballos no marco das obras de remodelación dos Cantóns, que continuarán agora na contorna da praza da Aduana, á beira dos edificios da Subdelegación do Goberno e a Casa Paredes. A intervención, centrada na pavimentación deste espazo, durará dous meses, “o tempo preciso para concretar actuacións como a supresión e cubrición da entrada ao aparcadoiro, clave para que, no futuro, discorran sobre el os carrís destinados ao tráfico de vehículos“, informa o consistorio.
Tamén se aproveitará esta intervención para dispor as novas pezas de pedra correspondentes á superficie peonil. Neste sentido, os dous meses establecidos para completar esta fase son necesarios para que dea tempo a que as laxas estruturais de formigón, as do firme, teñan marxe para forxar. En todo caso, non haberá incidentes nin cortes ao paso do tráfico rodado. O tránsito de vehículos autorizados desde a avenida da Mariña poderá pasar polo carril que se acoutará fronte á praza da Aduana, e os que cheguen á altura do Teatro Colón, en dirección á Mariña, disporán dun desvío alternativo.
