O Tribunal Superior de Xustiza de Galicia (TSXG) admitiu a trámite o recurso contencioso-administrativo interposto pola Asociación de Vivendas Turísticas de Galicia (Aviturga) contra a ordenanza municipal que regula as Vivendas de Uso Turístico (VUTs) na Coruña, segundo informa a entidade.
Nun comunicado, cualifica a normativa como “unha das máis restritivas de España” e insiste en que “incorre en graves vicios de nulidade”. Engade que o decreto xudicial “xa foi notificado” e require ao Concello herculino a “a remisión do expediente municipal completo”. Aviturga explica que, unha vez que conste no Tribunal, levará a cabo o proceso para formular a demanda, “que se prevé completar aproximadamente en outubro”, concreta.
A entidade fundamenta o seu recurso en que a ordenanza contén “graves vicios de nulidade ao invadir competencias que non son propias do consistorio”. “O Concello atribúese competencias estatais en materia de propiedade horizontal e tenta innovar na ordenación de actividades turísticas, cuxa regulación corresponde exclusivamente á Xunta”, sinala.
En concreto, considera que “un dos aspectos máis controvertidos” da nova regulación é que “ignora por completo os dereitos adquiridos de quen contan con rexistro turístico oficial desde 2017 e cumpren escrupulosamente con todas as normativas vixentes, tanto estatais como autonómicas”.
“TENSIONAR AÍNDA MÁIS O MERCADO”
A asociación denuncia ademais que a normativa “reproduce literalmente parágrafos enteiros doutras disposicións de rango superior, vulnerando o principio de xerarquía normativa”. Así mesmo, advirte que a ordenanza “podería tensionar aínda máis o mercado inmobiliario local”.
“O texto municipal permitiría que calquera edificio da cidade, tanto no centro histórico como nos barrios residenciais, poida destinarse integramente ao uso turístico”, apunta. Esta circunstancia, segundo recalca, “incentivará a investidores e propietarios a transformar inmobles actualmente dedicados ao aluguer convencional en bloques exclusivos para turistas”, unha situación que “prexudicará especialmente aos inquilinos máis vulnerables”.
Os cálculos de Aviturga indican que aproximadamente o 80% das vivendas turísticas actuais non cumprirían cos requisitos establecidos na nova ordenanza, cualificada pola asociación como “unha das máis restritivas de España”. A agrupación incide en que mantén “disposición ao diálogo” e confía que o Concello “poida reconsiderar a súa postura e estableza un diálogo construtivo cos propietarios para atopar solucións que garantan a seguridade xurídica e o desenvolvemento sustentable do sector turístico na cidade”.
