O festival Internacional Intersección da Coruña presentou hoxe a programación completa da súa oitava edición que se desenvolverá co apoio da Xunta do 26 de setembro ao 4 de outubro para ofrecer máis de 100 de películas independentes de 17 países e situarse como punto de encontro do cinema contemporáneo.
O festival acehga 17 filmes inéditos en España, incluíndo 7 estreas mundiais que o público descubrirá por primeira vez na cidade, en diferentes localizacións como os Cantones Cines, Filmoteca de Galicia, Fundación Luis Seoane e Palexco.
O director do festival Gonzalo E. Veloso, destacou que “Intersección converteuse nun espazo onde a creación galega dialoga cos nomes máis destacados do cinema internacional, atraendo á Coruña non só novas películas, senón tamén novos públicos e profesionais que reforzan o lugar da cidade no mapa cultural europeo”.
Cinema Galego
Se ben chegan filmes dende Finlandia ata Filipinas, pasando por Brasil, Austria, Francia ou Turquía, tamén hai produción propia. A Sección Galicia presenta unha panorámica ampla da creación audiovisual galega contemporánea, con once filmes que viaxan da memoria íntima á mitoloxía, da exploración ecolóxica ás identidades disidentes. Propostas que van desde a infancia retratada en Deuses de Pedra, de Iván Castiñeiras, ata a lenda medieval en Maldito Espírito, de Carlos Martínez-Peñalver, pasando pola experimentación poética de Canto rodado ou a reflexión ecolóxica de Alboroque, de Sabrina Fernández Casas.
A sección complétase cun formato expositivo que leva estas preocupacións fóra da sala, con instalacións que abordan cuestións como a relación natureza-industria, a memoria, a hibridación tecnolóxica ou a fisicidade da imaxe.
Punto de encontro para profesionais
O festival afiánzase como un importante punto de encontro para cineastas, produtoras e escolas de cinema de diversos países. É o caso de Nexus, o espazo da industria no festival, no que se enmarca o Intersección Lab. Con esta iniciativa, o festival coruñés ofrece titorías especializadas a creadoras e creadores galegos en fase de desenvolvemento. Este ano, os proxectos que gozan deste acompañamento son Antes de nada, de Sabela Eiriz; Cando as árbores choran, de Miguel Bouzas; GRISGRIS, de Raúl Capdevila Murillo; Lembrarás como bailabas, de Alba Gallego; Miñacora, de Eva Vaeli; Resonancias do escultor, de Uxía Caneda e Javier Darriba; Só o ruído, de Santos Díaz; SOS, de Nicolás Martínez, e Wólfram, de Sara Gil Méndez.
Podedes ver toda a programación na web do Festival.
Outras novas
A Semana do Cinema Galego pecha con máis de 300 espectadores diarios
