A Filmoteca de Galicia está a documentar centos de horas de vídeos de acontecementos históricos dos anos oitenta, procedentes do fondo depositado na cinemateca da Xunta polo produtor coruñés Xosé Xoán Cabanas Cao, trátase dunha cifra próxima ás 400 horas de material. Entre eles, a manifestación histórica que reclamaba a capitalidade de Galicia para a Coruña.
Así o detallou nunha nota de prensa a Xunta, na que tamén explicou que estes contidos pertencen a diversas produtoras e abarcan pezas de toda índole, tanto de ficción como documental, pero é neste último apartado no que o fondo destaca pola súa “singularidade histórica” dentro do panorama audiovisual galego dos anos oitenta.
A primeira das produtoras nas que Cabanas Cao tivo unha participación “moi activa” foi Espejo Vídeo Cine, creada en 1981, catro anos antes do nacemento da Televisión de Galicia. Neste sentido, a Xunta sinalou que “son moi escasos os rexistros videográficos da época, que esta empresa cubriu case de maneira exclusiva”.
Cabe destacar que a Filmoteca comezará a compartir este legado co público a través dunha serie de proxeccións que arrincan este xoves e que se estenderán ata decembro. Son un total de catro sesións, ordenadas por instantes moi concretos e por división temática, que se inician coa crónica política de Galicia entre os anos 1981 e 1983.
De feito, EspejoVídeo Cinema fixo para Unión de Centro Democrático os vídeos de campaña das eleccións autonómicas de 1981 e, na peza que se proxectará o xoves ás 20,30 horas, recóllese a visita a Galicia de Adolfo Suárez para apoiar aos candidatos e as declaracións das cabezas de lista das catro provincias explicando as principais ideas do seu programa.
PROXECCIÓNS HISTÓRICAS
Tamén se poderá lembrar nesta proxección a multitudinaria manifestación a favor da capitalidade na Coruña celebrada en 1982 e que reuniu nas rúas herculinas a unhas 150.000 persoas. Xa en 1983, o socialista Francisco Vázquez faríase coa alcaldía, inaugurando un novo ciclo político na localidade. O seu xura do cargo conforma o terceiro vídeo na sesión.
Para a segunda das sesións, que terá lugar o sábado ás 18,00 horas, seleccionáronse tres vídeos centrados no panorama cultural da Coruña en 1982, do que dá conta a festa da poesía en abril, o primeiro concurso de rock en xullo e o festival de cinema de comedia en outubro.
O primeiro dos acontecementos xuntou no Teatro Rosalía Castro recoñecidas figuras da literatura do momento, como Luz Pozo Garza, Bernardino Graña ou Miguel González Garcés, con algúns dos novos talentos da época, como Manolo Rivas ou Lois Pereiro. Mentres que no caso do festival de comedia dese ano, a cidade recibiu grandes estrelas de Hollywood como Ben Gazzara, Joan Bennett ou Steve Martin.
