O Concello da Coruña avanza na súa folla de ruta para actualizar a normativa municipal de terrazas, que establece unha nova ordenanza que hoxe lles foi exposta, como borrador, a asociacións e profesionais do sector hostaleiro. A alcaldesa, Inés Rey, presidiu a reunión, “concibida como un encontro informativo para avanzar nas medidas máis destacadas que se pretenden incluír na ordenanza”, explica o goberno local.

Entre elas, está o redeseño e adecuación das terrazas da praza de María Pita, unha vez finalizou o prazo de concesión das actuais e cuxo estado de conservación fai necesaria a súa substitución. Neste sentido, o Concello propuxo un modelo como o que se implantou en Donosti, con estruturas autoportantes e toldos a dúas augas que se poidan despregar e recoller, en ningún caso fixando elementos de instalación nas fachadas.

A formulación do goberno municipal tamén estipula a necesidade de que estes pórticos teñan unha sintonía estética no conxunto da praza e que se aliñen cos alicerces e con cores monocromáticas “para que María Pita teña unha imaxe de uniformidade e para preservar a unidade estética dunha praza que é un espazo protexido”. Tamén hoxe, na reunión desta tarde, informouse o sector hostaleiro de que a futura normativa de terrazas atenderá especialmente á regulación daquelas que se habilitaron en zonas de estacionamento no contexto da pandemia da Covid-19.

Agora o Concello propón un regulamento específico para ese tipo de terraza, que seguirá podéndose instalar en determinados casos e condicións, pero que non será compatible para os hostaleiros e as hostaleiras coa terraza na beirarrúa. Será preciso que escollan unha das dúas opcións para minimizar a ocupación de chan público.