A Asociación de Directoras e Directores de Arte Contemporánea de España (ADACE), unha das primeiras entidades que alzaron á voz cando o Xornal da Coruña destapou a polémica arredor do concurso do posto de dirección na Fundación Luís Seoane, quere expresar “a súa satisfacción pola recente decisión da Alcaldesa da Coruña e Presidenta do Padroado da Fundación Luis Seoane de renovar o proceso de concurso público para a dirección da devandita institución.
A entidade considera que “esta medida constitúe un paso esencial para garantir as mellores condicións de transparencia, rigor e lexitimidade na designación do futuro equipo directivo”.
Ante esta nova situación, a entidade, que leva máis de 20 anos vixiando e denunciando casos desta natureza no ámbito dos museos e centros de arte contemporánea en España, e que conta con destacas figuras da dirección de museos e centros contemporáneos do estado español como Manuel Segade (Reina Sofía), Imma Prieto (Fundación Tàpies), Yolanda Romero (Colección Banco de España), Javier Hontoria (Patio Herreriano), José Lebrero (Museo Picasso), Santiago Olmo (CGAC), entre outros, “pon ao dispor do Concello da Coruña e do Padroado da Fundación Luis Seoane o seu asesoramento institucional, ofrecendo acompañamento en todas as fases do proceso”.
Aseguran que “este apoio abarca tanto a revisión e redacción das bases do concurso como a definición dos criterios de valoración e a composición do comité avaliador, co fin de asegurar que independencia, profesionalidade e boas prácticas sexan os principios reitores do procedemento”.
Aproveitan para lembrar que “como asociación que, desde 2004, traballa de maneira continuada na defensa e aplicación do código de boas prácticas no ámbito dos museos e centros de arte contemporánea en España —e que integra a profesionais que actualmente dirixen algunhas das principais institucións culturais do país—”, e reafirman o seu “compromiso coa calidade institucional, a excelencia profesional e a transparencia nos procesos de selección”.
“Estamos convencidos de que só mediante a plena aplicación do código de boas prácticas neste novo concurso público será posible restablecer a confianza da comunidade profesional e da cidadanía, así como honrar e preservar a memoria de Luis Seoane, figura clave na construción da identidade cultural de Galicia”, aseguran.
Máis novas do procedemento
A Fundación Luís Seoane recúa e volverá a abrir o procedemento de designación da dirección
ADACE cuestiona “a equidade do concurso e a confianza na gobernanza da Fundación Luís Seoane”
