A alcaldesa da Coruña, Inés Rey, expresou as súas dúbidas sobre a “palabra” da Xunta respecto da descentralización do grao de Medicina e cualificou de “cortoplacista” e “arcaica” a postura do Goberno galego e da USC. Nunha entrevista na Cadena SER, Rey asegurou que non se fía do preacordo que Xunta e universidades analizarán este luns nun grupo de traballo. “Algo que se daba por feito a principios de semana aínda non está confirmado”, dixo, lembrando que leva “anos” escoitando falar de descentralización “sen que se producise”.

A rexedora criticou tamén a negativa “sistemática” a crear dúas novas universidades públicas e defendeu Vigo e A Coruña como áreas clave en PIB, empresas e emprego. Ademais, reiterou a súa oposición a permitir que universidades privadas impartan Medicina: “Se non hai demanda, tampouco a hai para a privada”.

Sobre a mobilidade, Rey avanzou que o Concello xa prepara unha ordenanza para os VTC, aínda que pediu unha regulación común para evitar “inseguridade xurídica”. Acusou ao PP de deixar “a pataca quente” aos concellos e de fomentar “tensión” nas cidades. En política aeroportuaria, chamou a coordinar unha estratexia conxunta e reclamou á Xunta un proxecto claro: “Se o presidente lidera unha política común, estarei ao seu lado”.