Algo pasa cando familias de toda a comarca estean na rúa día si e día tamén contra o desleixo das administracións para cos seus centros de ensino. Estes días temos visto todas as familias dos 5 colexios de Oleiros unidas contra os recortes do profesorado, temos visto á comunidade escolar do CEIP Prácticas celebrar un ano de mobilizacións ante o deterioro rabioso das instalacións, e temos visto ás familias do colexio da Cidade Vella unirse ante o abandono das administracións.
A do sábado, foi unha manifestación multitudinaria. Moitas familias secundaban a convocatoria da ANPA do CEIP Cidade Vella, que partía do propio centro e acabana diante do concello (Praza de María Pita). As familias levaban pancartas de todo tipo, demandando unhas necesarias obras de reparación urxentes para garantir a seguridade e saúde dos nenos e nenas. “Queremos unha escola digna e segura” rezaba a pancarta principal, apoiada por outras pancartas e cánticos con “A Escola está morta, familias en loita” ou “Os nenos tamén somos cidadáns”.
Duras críticas ás administracións
“Hoxe chegamos ata aquí xuntas para poñer límites ás escusas que levamos aturando anos, mentres vemos como o centro das nosas fillas e fillos se degrada ante a pasividade de quen tería que coidalo. Este colexio cae e non imos deixar que con el caian tamén a dignidade e a seguridade das nosas nenas e nenos”, sinalan no manifesto lido en María Pita.
“Nos últimos anos pedíronnos paciencia, comprensión e tempo; o mesmo tempo que tivemos que empregar en arranxar e custear nós mesmas os arranxos máis urxentes do edificio. Medidas de urxencia non só para o seu mantemento inmediato, senón para frear o seu deterioro continuo. Coa paciencia esgotada e a comprensión limitada, esiximos o mínimo cumprimento das competencias asignadas a cada administración para construír entre todas un colexio seguro, digno, reparado e atendido. Sen pingueiras nas mesas, sen humidades nas aulas, sen fendas que percorren os muros e óxido que se acumula en reixas e estructuras”.
“Non estamos a pedir favores, nin moito menos luxos: estamos a esixir a garantía de cumprimento dos nosos dereitos e a aplicación das responsabilidades derivadas das súas
competencias.
Requirimos a aplicación dos acordos que xa están aprobados. Temos escoitado plans,
reformas, partidas orzamentarias, melloras urxentes… pero onde están? As familias
estamos cansas de titulares e frases para gañar tempo: “Estamos niso”, “Estamos
valorando”, “Está previsto” … Queremos planificación das melloras, obras e. transformacións reais. Queremos que se cumpra o asinado”, solicitaron con contudencia, deixando claro que piden acción a todas as administracións non teñen intereses partidistas. “Este colexio non é un debate, é un punto de unión”.
“Queremos compromisos firmes, solucións reais, investimentos e promesas realizadas. Que as institucións actúen agora, que as medidas se coordinen XA”, apuntaron invitando a continuar a loita.
Máis novas
A ANPA do CEIP de Prácticas non cede tras un ano en loita contra o deterioro do centro
