Defensa do Común e a asociación veciñal da Cidade Vella anuncian para este venres, día 16, ás 20:00 unha sesión informativa na que explicarán toda a casuística relacionada coas parcelas do Campo da Estrada-Maestranza.
Explicarán a situación actual trala paralización ordenada polo Concello dos traballos que estaban a realizarse na parcela número 2, interrupción motivada polas reiteradas solicitudes formuladas por Defensa do Común ao estimar acreditados incumprimentos por parte da promotora relacionados coa concesión da licenza de obras outorgada no seu momento.
O acto informativo terá lugar no local social de Portas Ártabras (Rúa Sinagoga, 22) coa intención de clarificar calquera dúbida xurdida en boa parte da veciñanza que habita os inmobles próximos. Benedito Álvarez, membro da directiva de Defensa do Común, ofrecerá as preceptivas explicacións sobre un asunto cuxo orixe remóntase a 2016 co anuncio da primeira poxa anunciada polo Invied.
A data deste acto resulta tanto máis importante canto que coincide precisamente cos seis meses transcorridos desde o 16 de abril, data na que o TSXG debatiu e votou o contido da sentenza, aínda que non a notificou ás partes. Como se lembrará, Defensa do Común interpuso no seu día sendos recursos tanto ao Estudo de Detalle da parcela número 2 como ao outorgamente da licenza correspondente, aínda que condicionada ao resultado do fallo xudicial.
Máis novas do proceso
Piden paralización real das obras da promoción de luxo na Maestranza
