A sección sexta da Audiencia Provincial da Coruña condenou a dous anos e medio de prisión á socia e administradora dunha asesoría da Pobra do Caramiñal como autora dun delito continuado de administración desleal e outro de falsidade en documento mercantil. A sentenza considera probado que entre 2015 e 2020, a acusada realizou diversas extraccións e transferencias de fondos da sociedade para o seu “beneficio persoal”, sen o coñecemento nin consentimento da outra socia.

A Sala acreditou que a muller se apropiou de 27.416,40 euros mediante retiradas de efectivo e 5.026 euros a través de transferencias. Os feitos incluíron a realización de compras persoais de roupa, perfumes e reparacións de vehículos con fondos da sociedade. Ademais, desviou diñeiro de dúas comunidades de propietarios que xestionaba, aínda que unha parte foi devolta.

A muller tamén foi condenada por falsificar a firma da súa socia nunha póliza de crédito a nome da asesoría, quedando ela coa maioría dos fondos, que ascendían a uns 6.805 euros, ata que a socia descubriu a póliza en outubro de 2020.

A pena total imposta é de dous anos e medio de cárcere e seis meses de multa. Ademais, a acusada deberá facer fronte ao pago dunha indemnización de 36.966 euros á asesoría. A sentenza, non obstante, non é firme e cabe recurso de apelación ante o Tribunal Superior de Xustiza de Galicia (TSXG).