Espectacular manifestación a que protagonizaron as familias da ANPA do CEIP de Prácticas da Coruña esta mañá de venres 19 de decembro. Un novo venres de loita “por unha escola segura e digna”, que xuntou ducias de familias ás 8:30h, enchendo de arengas o treito entre a Praza da Tolerancia e Paseo de Ronda, pasando pola Avenida Gran Canaria, a rúa Almirante Lángara, e Manuel Murguía.
A comunidade educativa volveu saír á rúa unha vez que seguen sen ter resposta ao “proxecto de reforma integral do centro” prometido pola Consellería de Educación. E mentres as administracións se pasan a pelota de tellado en tellado, o centro continúa agravando os seus importantes problemas de humidade que afectan á saúde do alumnado, cun estado deficiente das ventás, pingueiras, danos en mobiliario, e unha fachada e interior coa pintura desgastada. Ademais, e tal e como se advertira, as inspeccións pertinentes confirmaron que a instalación eléctrica precisa dunha reforma a fondo ao non cumprir cos requisitos de seguridade. Problemas todos que xa foran denunciados desde hai anos polas canles oficiais e privadas.
Lembra a ANPA que dende novembro de 2024 a Consellería de Educación, soamente realizou unha serie de obras menores coma a substitución do beiril da entrada ou do enreixado da parte baixa das ventás. A día de hoxe nada se sabe do proxecto de reforma do centro, aprobado polas administracións en xaneiro de 2025.
“Xa abonda”, sinalan con rotundide. “O desleixo ao que nos teñen sometido as administracións nos últimos tempos e a progresiva e constante deterioración das instalacións —co evidente perigo e risco para os máis de 200 alumnos e alumnas e persoal traballador— obrigan a unha resposta máis áxil, decidida e firme ante unha situación insostible. Con compromisos e prazos claros”.
View this post on Instagram
Máis novas sobre o ensino público
Un ano de loita polo CEIP Prácticas: “As familias estamos fartas!”
O profesorado conmemora unha marcha fúnebre polo ensino público na súa primeira xornada de folga
Indignación nas familias do CEIP Cidade Vella tras escoitar en directo “as mentiras” da Xunta
ANPA do CEIP de Tarrío esixe á Xunta máis recursos e atención inmediata
As ANPAS dos colexios de Oleiros levaron o seu manifesto ao pleno
Outras novas das ANPAS
