A Xunta construirá 264 novas vivendas de promoción pública en Xuxán, na Coruña, unha vez que remate a modificación do Plan Xeral de Ordenación Municipal (PXOM) que permitirá modificar o uso de parcelas de terciario a residencial. O Consello da Xunta abordou a licitación do contrato para a redacción do proxecto e dirección de obra para a construción das devanditas vivendas, que será por un importe de máis de 1,6 millóns de euros.

O investimento autonómico estimado na execución das obras de construción destas novas vivendas superará os 50,1 millóns de euros. As mesmas construiranse na parcela 46 de Xuxán, propiedade da Xunta, que inicialmente estaba destinada a usos terciarios pero que, por instancia do Instituto Galego de Vivenda e Solo (IGVS), destinarase á construción de vivendas de promoción pública unha vez rematada a modificación puntual da PXOM por parte do Concello, apunta a Xunta.