A alcaldesa da Coruña, Inés Rey, e o reitor da Universidade da Coruña (UDC), Ricardo Cao, asinaron este luns un acordo de cesión de tres edificios da Cidade das TIC á institución académica e “máis de 11 millóns de euros” para a súa rehabilitación. Deste xeito, o consistorio “asume a titularidade da concesión e a súa xestión integral, mentres que a UDC mantén o liderado académico e científico das actuacións que se desenvolvan no proxecto”. Así o manifestaron despois da formalización desta transferencia que ten lugar tras o acordo asinado o pasado ano entre ambas as administracións e a autorización emitida polo Ministerio de Defensa.
“Un paso decisivo para consolidar o desenvolvemento da Cidade das TIC como polo tecnolóxico e industrial de referencia en Galicia”, sinalou a rexedora e recalcou que nesta cuestión a UDC ten un “papel relevante”. “O obxectivo é continuar reformando esas naves, xerando emprego de calidade e dinamizando a área económica da Coruña vinculada tamén coa parte académica”, expuxo. Pola súa banda, Cao destacou que esta decisión permite “avanzar cara a un modelo de gobernación máis eficiente, no que as administracións con competencias urbanísticas, industriais e empresariais poidan impulsar o desenvolvemento das infraestruturas, garantindo ao mesmo tempo que todas as iniciativas de formación, investigación e transferencia da Cidade das TIC continúen baixo a coordinación académica da UDC”.
USOS
Como parte do acordo, o Concello cederá á UDC tres edificios do complexo, que serán rehabilitados para “uso docente, investigador e de transferencia tecnolóxica“, incidiu o reitor. Respecto diso, lembrou que a Cidade das TIC conta xa con máis de 25 millóns de euros investidos en diferentes infraestruturas (CSA, Galaxy Lab, CEI e Centro de Produción Audiovisual Avanzada) e que se atopa “nun momento decisivo” para o seu despregamento industrial, tecnolóxico e formativo. Así, explicou que esta transferencia permitirá “avanzar simultaneamente na planificación urbanística, na captación de empresas e na posta en marcha de novos centros universitarios e de investigación”.
