Que Bud Bunny vestise unha camiseta de Zara foi algo moi pensado. Que unha estrella mundial utilice, en plena Superbowl, unha marca asequible para todos os petos, foi toda unha demostración de principios.

O cantante portorriqueño Bad Bunny quixo ter un detalle especial co persoal das oficinas centrais de Zara, a compañía galega que escolleu para vestir na súa celebrada actuación no descanso da Super Bowl deste domingo. En concreto, os traballadores da sede de Inditex en Arteixo atopáronse este luns cunha camiseta idéntica á que luciu o artista sobre o escenario, acompañada dunha nota de agradecemento.

Nela podía lerse: “Grazas polo tempo, o talento e o corazón que puxeron nisto. Grazas por facelo real. Este show tamén foi de vostedes. Espero que o gocen. Vémonos pronto!”, xunto coa data da Super Bowl 2026. Bad Bunny, nome artístico de Benito Antonio Martínez Ocasio, foi o encargado de protagonizar o espectáculo do descanso da Super Bowl 2026, celebrado no Levi’s Stadium, en Santa Clara, na madrugada do domingo.

A actuación tivo unha enorme repercusión internacional, tanto pola súa posta en escena como pola reivindicación da identidade latina a través da música e da estética. Para o show, o artista apostou por un outfit completo de Zara, composto por camisa, gravata, pantalóns chineses e unha camiseta deportiva de estilo linebacker, inspirada nos equipamentos do fútbol americano. Esta última foi unha das pezas máis comentadas da noite e é precisamente a que recibiron agora os empregados da compañía en Arteixo.

Trátase dunha peza customizada coa inscrición “Ocasio” nas costas e o número 64, deseñada expresamente para a actuación. Na segunda parte do espectáculo, Bad Bunny desprendeuse da camiseta deportiva e apareceu cunha blazer cruzada de dobre botonadura, tamén da marca galega, no mesmo ton.