Estación Visual A Coruña presetou este venres o resultado do‘crowfunding’ para financiar o seu proxecto de reconstrución virtual da historia do territorio da cidade herculina desde hai 350.000 anos, así como da evolución da Torre de Hércules co paso dos mesmos. “Foi un proxecto integrador no científico e no histórico pola súa escala espacial e temporal á que podemos achegarnos cun fotorrealismo de escala humana”, indicou Enrique Cabarcos, portavoz do proxecto, durante a presentación na que participou un dos maiores especialistas galegos en xeografía, Juan Ramón Vidal Romaní, que tamén participou no proxecto, e o reitor da UdC, Xulio Abalde.
Este gran proxecto reconstrúe boa parte da historia xeolóxica da Coruña e permite que nos acheguemos a feitos universais como as glaciacións, as subas e baixadas do nivel do mar, os cambios nas especies, a chegada do ser humano ou o Imperio Romano. “O proxecto móvese nas dúas direccións: permite ver “todo” a través da Coruña, pero tamén coloca A Coruña no centro”, indicou Cabarcos.
Estación Visual realizou un gran proxecto para entender doutro xeito o que foi a evolución da Coruña como paisaxe e como cidade. “Nós vivimos vidas nas que a paisaxe natural é moitas veces case inmutable. Pero, a outra escala, esa paisaxe inmutable é circunstancia. E tamén o libro ten un certo valor evocador nese sentido. Tantas transformacións naturais ata chegar ao mapa recoñecible”, suliñou.
POR QUE NON SE IMPLICAN AS INSTITUCIÓNS?
Este proxecto non queda só na época romana. O proxecto completo está concibido (e traballado en parte) ata o século XIX. Por iso, o obxectivo agora é reconstruir eses case 1.500 anos que aínda quedan por coñecer da cidade. Por iso, o proxecto está aberto a que as institucións públicas (ou entidades privadas) para que promovan economicamente a súa ampliación e continuidade.
“É un proxecto aberto a medrar permanentemente tanto polo traballo de fondo como por concepto, polas disciplina e novidades que pode incorporar e, en último termo, sempre adaptable aos novos avances tecnolóxicos”, dixo Cabarcos. O obxectivo é que A Coruña sexa unha cidade de referencia ao ter un Observatorio do seu propio pasado con todas esas características.
