O Concello da Coruña deu luz verde este mércores a un novo paquete de obras de humanización que afectarán ás rúas Páramo, Atocha Alta e a diversas zonas da Agra do Orzán. Na Xunta de Goberno local tamén se aprobou a licitación para construír un novo espazo lúdico e deportivo no parque Adolfo Suárez, unha actuación que busca reforzar as áreas de lecer da cidade.

A alcaldesa, Inés Rey, informou así mesmo da recuperación de dous locais na Bágoa de San Roque. O obxectivo da administración municipal é rehabilitar este espazo para convertelo nunha nova dotación de uso público para a veciñanza. No ámbito social, o consistorio acordou ampliar a gratuidade do servizo nas escolas infantís municipais, incluíndo tamén dúas horas extraordinarias por xornada e simplificando as bases para facilitar o acceso das familias á rede de centros.

Noutra orde de cousas, a rexedora anunciou que A Coruña presentará formalmente a súa candidatura para converterse na sede do congreso da Asociación Española de Parques e Xardíns no ano 2028. “Somos a candidatura perfecta”, sentenciou Inés Rey, quen destacou o potencial verde da cidade para acoller este evento profesional de referencia nacional.