Os bombeiros da Coruña prestaron un total de 2.026 actuacións en 2025, unha cifra superior ás 1.914 de 2024, segundo informou a concelleira de Seguridade Cidadá, Montse Paz, na presentación do balance do ano pasado. “As tarefas que o servizo de bombeiros realiza son moi diversas e cada vez máis especializadas e o noso servizo destaca non só no territorio galego senón tamén en España”, aseverou.
Nun 84,87% das intervencións de todo o ano, os bombeiros chegaron ao lugar de emerxencia en doce minutos ou menos desde o momento de recibir a chamada de socorro. Nun 25,94% deles, chegouse en menos de cinco minutos, explicou a concelleira. Un 67% dos operativos foron resoltos, ademais, nun tempo de 45 minutos.
Por outra banda, a responsable de Seguridade Cidadá aludiu ás actuacións en municipios limítrofes para colaborar cos servizos de seguridade e emerxencias. Foron tres intervencións en Arteixo e unha en Bergondo. Así mesmo, en labores de prevención especificamente vinculadas a alertas de temporal, contabilizáronse un total de 103 actuacións.
