Os alumnos Omar Badriev Gazizov e Lois Queijeiro Varela, do Instituto Plurilingüe de Elviña (A Coruña), representarán a Galicia no debate escolar de oratoria en inglés Global Classroom impulsado por Nacións Unidas, cuxa final se celebrará en Nova York en abril.
Ambos acaban de proclamarse gañadores da primeira edición do debate escolar en inglés Global Classroom, centrado este ano no cambio climático desde a perspectiva da posición oficial dos diferentes países da ONU.
Outras catro parellas resultaron finalistas: Sabela González Martínez e María Serrano Pérez, do Instituto Plurilingüe A Paralaia (Moaña); así como outro tres, todas elas do IES Plurilingüe Rosalía de Castro (Santiago de Compostela): Andrea Otero Dopazo e Sara Dá Costa Cabanas; Marta Curral Martínez e Berta Barreiro Tasende; e Noa Altable Ledo e Martín Neira Boga.
A directora xeral de Ordenación e Innovación Educativa, Judith Fernández, participou esta semana na entrega de diplomas aos alumnos participantes e gañadores da final da primeira edición do debate escolar Global Classroom. Trátase dunha iniciativa en inglés na que alumnos de 3º de ESO simula as sesións da ONU, actuando como delegados, debatendo, presentando as súas propostas e negociando resolucións en inglés.
“Galicia é, por segundo ano consecutivo, a comunidade con maior nivel de inglés segundo o informe de Education First (EF), o que demostra que as accións de impulso do plurilingüismo que promovemos desde o Goberno galego están a dar os seus froitos”, sinala a directora xeral.
