Novo fito do conflito do Programa de Lecer. Mentres pasan as semanas e os cursos culturais do Fórum e do Ágora seguen sen arrincar, o persoal docente tiña unha cita no Servicio de Mediación, Arbitraxe e Conciliación (SMAC) no proceso de conciliación pola débeda contraída pola empresa Serviplús.
Tratábase do primeiro dos casos que terán que pasar pola conciliación, o dun dos 10 traballadores (o 15% dos afectados) que aínda teñen débedas pendentes. Un asunto que xa en si mesmo supón unha promesa incumplida por parte de Gonzalo Castro, que asegurou o 23 de febreiro que “en 15 días estarían resoltas” todas as débedas.
Con todo, non compareceu á cita a empresa adxudicataria, Serviplustotal, provocando que o proceso se convirta xa nun expediente de despedimento por vía xudicial, dilatando un conflito que afecta a ducias de familias e a miles de usuarios.
Tampouco se presentou o Concello da Coruña como responsable subsidiario, e é certo que o Concello non estaba citado pero os docentes aseguran que na reunión do pasado 23, o Concelleiro de Cultura, Gonzalo Castro, o asesor Uxío Novoneyra e a directora do IMCE Laura Seoane que, si que se comprometeran a presentar documento de subrogación que cren que podería permitir que o procedemento no se xudicializara.
Máis alá diso, o colectivo de educadores considera a falta á cita “unha falta de respecto” e “unha falta de interese en dar unha solución aos traballadores que permanecen nun limbo legal e sen cobrar dende decembro”.
O colectivo poñen o foco en Castro e Seoane. “O Concello prorrogou o contrato a Serviplus en setembro de 2025 sabendo dos problemas da empresa, esta é a orixe da problemática que hoxe nos trae aquí”, denuncian. Critican tamén as falsas promesas sobre os prazos de reactivación do programa: “Prometeuse que o servizo arrancaría o 2 de febreiro “si ou si”. Hoxe, 12 de marzo, xa non hai resposta do IMCE”.
E tamén denuncian a “opacidade” municipal. “Mentres os usuarios piden reunións sen éxito e os traballadores son ignorados pola alcaldesa e acumulan impagos e meses sen traballo, o Concello fala dunha “cesión de contrato” que nunca chega”.
Seguen preguntándose “Como pretende o IMCE cumprir o prego técnico e sacar adiante o Programa de Lecer?”, se ben dende o Concello aseguran que “continúan co plan xa descrito”.
“Non só nos quitaron o noso salario, están matando un programa que é patrimonio cultural da cidade. A nosa antigüidade de máis de 25 anos non se borra por moito que o Concello non se presente aos actos de conciliación”, declaran os voceiros do colectivo
Máis novas do Conflito
Os docentes do programa de Lecer fártanse das “mentiras” municipais
