A CIG-Ensino denunciou unha situación de “deterioración estrutural” e “abandono” en centros educativos da Coruña por parte da Consellería de Educación, Ciencia, Universidades e Formación Profesional, e convocou para este mércores, día 18 de marzo, unha concentración fronte á Dirección Territorial da Consellería de Educación na cidade herculina.
Así o trasladou o sindicato nun comunicado, no que instaron á Xunta a dedicar “de maneira inmediata” o orzamento “necesario” para solucionar as “deficiencias estruturais máis urxentes” que “afectan á seguridade e saúde”, así como a que “sexa transparente co calendario de obras pendentes”.
“Animamos a toda a comunidade educativa a participar nesta reivindicación. É necesario un incremento dos orzamentos para o mantemento de edificios que superan, en moitos casos, os 40 anos de antigüidade”, engadiron, denunciando, entre outras cousas, pingueiras, instalacións eléctricas “obsoletas, deficientes e perigosas”, sistemas de calefacción “anticuados” ou “falta de illamento térmico”.
“Faise aínda máis vergoñosa a resposta da Administración, que non só mostra a súa desidia, senón que por encima transmite, por boca do propio conselleiro de Educación, Román Rodríguez, que se trata dunha situación de ‘normalidade'”, lamentaron, á vez que apuntaron a Rodríguez criticando unha educación que “dista moito de ser de calidade, como tanto lle gusta presumir”.
